व्हॉईस ऑफ मिडिया इंटरनॅशनल फोरमला ISO 9001:2015 प्रमाणपत्राचा मान
व्हॉईस ऑफ मिडिया इंटरनॅशनल फोरमला ISO 9001:2015 प्रमाणपत्राचा मान
मुंबई प्रतिनिधी
जागतिक स्तरावर पत्रकारिता, माध्यम क्षेत्रातील विविध उपक्रम, पत्रकारांच्या हक्कांचे संरक्षण आणि आंतरराष्ट्रीय पत्रकार नेटवर्किंगमध्ये सातत्याने कार्यरत असलेल्या व्हॉईस ऑफ मिडिया इंटरनॅशनल फोरम (VOM International Forum) या संस्थेला प्रतिष्ठेचे ISO 9001:2015 गुणवत्ता व्यवस्थापन प्रणालीचे प्रमाणपत्र नुकतेच प्रदान करण्यात आले आहे. या प्रमाणपत्रामुळे संस्थेच्या कार्याला आंतरराष्ट्रीय दर्जाची अधिकृत मान्यता प्राप्त झाली आहे.
पनवेलमधील खारघर येथे फ्लॅट नं. 1201, एल-30, स्वप्नपूर्ती, सेक्टर 36 या ठिकाणी संस्थेचे प्रमुख कार्यालय आहे. पत्रकार, मीडिया प्रतिनिधी, तसेच जागतिक स्तरावर कार्यरत पत्रकार संघटनांना एकत्र आणणे, त्यांच्यात परस्पर सहकार्य निर्माण करणे आणि विविध खंडांतील पत्रकारांच्या हक्कांसाठी लढा देणे हे या संस्थेचे प्रमुख ध्येय आहे.
संस्थेच्या कार्यक्षेत्रात आंतरराष्ट्रीय पत्रकार नेटवर्किंग, जागतिक मीडिया भागीदारी, पत्रकार हक्क संरक्षण, प्रशिक्षण व परिषदांचे आयोजन, मीडिया एक्स्चेंज कार्यक्रम तसेच आशिया, आफ्रिका, युरोप आणि अमेरिका खंडामध्ये माध्यमांच्या माध्यमातून शांतता व लोकशाहीचा प्रसार अशा महत्त्वाच्या क्षेत्रांचा समावेश आहे. या सर्व उपक्रमांमुळे संस्था केवळ भारतातच नव्हे तर आंतरराष्ट्रीय पातळीवरही पत्रकारिता क्षेत्रात आपली वेगळी ओळख निर्माण करण्यात यशस्वी ठरली आहे.
या प्रमाणपत्राचा क्रमांक QMS/230620/8599 असा आहे. संस्थेला प्रदान करण्यात आलेले हे प्रमाणपत्र आंतरराष्ट्रीय मानक प्रमाणन संस्था (International Standards Certification – ISC) यांनी जारी केले असून, ते Euro UK मान्यताप्राप्त आहे. प्रमाणपत्राचा मूळ दिनांक १ ऑक्टोबर २०२५ असा असून, त्याचा वैध कालावधी ३० सप्टेंबर २०२८ पर्यंत असेल.
प्रमाणपत्र देताना ISC च्या अधिकृत प्रतिनिधी नंद कुमार यांनी स्वाक्षरी करून मान्यता दिली आहे. यासंदर्भात प्रमाणपत्राची पडताळणी करण्यासाठी www.euroukals.org.uk या संकेतस्थळाचा वापर करता येणार असल्याचेही अधिकृतरीत्या नमूद करण्यात आले आहे.
या यशाबद्दल संस्थेचे पदाधिकारी आणि सदस्यांनी आनंद व्यक्त केला आहे. संस्थेच्या वतीने सांगण्यात आले की, “ISO 9001:2015 प्रमाणपत्र हे आमच्या कामगिरीची आणि विश्वासार्हतेची अधिकृत नोंद आहे. पत्रकारिता क्षेत्रातील पारदर्शकता, गुणवत्ता व जागतिक सहकार्य वृद्धिंगत करण्यासाठी आम्ही सतत प्रयत्नशील आहोत. हे प्रमाणपत्र मिळाल्याने आमचे कार्य आणखी सक्षम होईल.”
या उपक्रमाचे विशेष वैशिष्ट्य म्हणजे, संस्था विविध खंडातील पत्रकार व मीडिया प्रतिनिधींना एकाच मंचावर आणून ‘ग्लोबल मीडिया पार्टनरशिप’ निर्माण करण्यावर भर देते. तसेच पत्रकारांच्या प्रशिक्षणासाठी परिषदा, कार्यशाळा आणि विनिमय कार्यक्रम आयोजित करून अनुभवांची देवाणघेवाण साधते.
