चैन स्नॅचिंग करणाऱ्या आंतरजिल्हयातील सराईत गुन्हेगारांच्या बांधल्या मुसक्या;  नाशिक ग्रामीण स्थानिक गुन्हे शाखेची कामगिरी

चैन स्नॅचिंग करणाऱ्या आंतरजिल्हयातील सराईत गुन्हेगारांच्या बांधल्या मुसक्या; 

नाशिक ग्रामीण स्थानिक गुन्हे शाखेची कामगिरी

सिन्नर प्रतिनिधी

नाशिक ग्रामीण स्थानिक गुन्हे शाखेचे पोलिस निरीक्षक राजू सुर्वे यांच्या मार्गदर्शनाखालील पथकाने एका जिल्ह्यातून दुसऱ्या जिल्ह्यात चेन स्नॅचिंग करणाऱ्या सराईत गुन्हेगारांच्या मुसक्या बांधल्या असून या कामगिरीमुळे ग्रामीण भागातील महिला वर्गात पसरलेली दहशत सध्या तरी कमी झाली आहे.

या संदर्भात पोलिस सूत्रांनी दिलेली माहिती अशी की,

दि.२९/११/२०२४ च्या सायंकाळी सिन्नर शहरातील सदरवाडी रोडवर अज्ञात दुचाकीस्वारांनी भरधाव वेगाने येत पायी चालणाऱ्या महिला शिक्षीकेच्या गळयातील सोन्याची पोत जबरीने चोरी करून चोरून नेल्याचा गुन्हा बाबत सिन्नर पोलीस ठाण्यात दाखल होता.त्यानंतर तीनच दिवसात म्हणजे दि. ०२/१२/२०२४ रोजी दुपारच्या सुमारास सिन्नर शिर्डी महामार्गावर मुसळगाव शिवारात काळ्या रंगाच्या दुचाकीवर भरधाव वेगाने आलेल्या दोन चोरटयांनी विनर टाऊनशिप, मुसळगाव येथे राहणाऱ्या एका महिलेची सोन्याची पोत जबरीने ओरबडून नेली होती. त्याचाही गुन्हा सिन्नर MIDC पोलीस ठाण्यात दाखल होता.

या एका पाठोपाठ घडणाऱ्या चेन स्नॅचिंगच्या प्रकारांमुळे सिन्नर तालुक्यातील महिला वर्गात प्रचंड घबराट पसरली होती. पोलिस अधीक्षक विक्रम देशमाने, अपर पोलीस अधीक्षक आदित्य मिरखेलकर यांनी वरील दोन्ही गुन्हयांचा आढावा घेवून गुन्हे उघडकीस आणणेसाठी सुचना दिल्या होत्या. त्यानुसार स्थानिक गुन्हे शाखेचे पोलीस निरीक्षक राजु सुर्वे यांनी सदर गुन्हयातील फिर्यादींनी सांगितलेले आरोपींचे वर्णन व गुन्हयात वापरलेल्या दुचाकीवरून गोपनीय माहिती प्राप्त केली. त्यावरून हे गुन्हेगार अहिल्यानगर जिल्हयातील असल्याची खात्रीशीर माहिती मिळाली. त्यावरून स्थानिक गुन्हे शाखेचे पथकाने अहिल्यानगर जिल्हयातील अशोकनगर, ता. श्रीरामपुर परिसरात सतत दोन दिवस पाळत ठेवून सराईत गुन्हेगार अजय संजय पंडीत, वय १९, रा. वहगाव निपाणी, ता. श्रीरामपुर, नि. अहिल्यानगर यास शिताफिने ताब्यात घेतले. सदर आरोपीस विश्वासात घेवुन चौकशी केली असता त्याने त्याचा साथीदार गणेश विजय चव्हाण, रा. अशोकनगर, श्रीरामपुर, जि. अहिल्यानगर यांना ताब्यात घेतले. बजाज पल्सर मोटर सायकलवर येवुन सिन्नर शहरात वरील चैन स्नॅचिंगचे गुन्हे केल्याची कबुली त्यांनी दिली.

ताब्यात घेतलेला आरोपी अजय संजय पंडीत यास वरील गुन्हयात अटक करण्यात आली असून त्याचे कब्जातुन वरील गुन्हयांमध्ये वापरलेली बजाज पल्सर मोटर सायकल, तसेच गुन्हयात चोरी केलेले सोन्याचे दागिने विक्री करून त्याचे वाटयाला आलेली रोख रक्कम १,००,०००/- हस्तगत करण्यात आली आहे. सदर आरोपीचा साथीदार गणेश विजय चव्हाण याचा पोलीस पथक कसोशिने शोध घेत असून सदर आरोपीतांकडून चैन स्नॅचिंगचे आणखी गुन्हे उघडकीस येण्याची शक्यता आहे.

 अजय संजय पंडीत याचेविरुध्द दाखल असलेले गुन्हे:-

 

१) MIDC वाळुंज पो.स्टे. नि. छत्रपती संभाजीनगर गुरनं ५९६/२०२३ भादवि ३७९

 

२) श्रीरामपुर पो.स्टे. जि. अहिल्यानगर गुरनं ६१/२०२४ भादवि ३९२

 

३) लोणी पो.स्टे. जि. अहिल्यानगर गुरनं ५६५/२०२४ भा.न्या.सं. ३०९ (४),३ (५)

 

स्थानिक गुन्हे शाखेचे पोलीस निरीक्षक राजु सुर्वे, सपोनि संदेश पवार, पोलीस अंमलदार नवनाथ सानप, विनोद टिळे, हेमंत गिलबिले, प्रदिप बहिरम यांचे पथकाने वरील चैन स्नॅचिंगचे दोन गुन्हे उघडकीस आणल्यामुळे आंतरजिल्हा चेन स्नॅचिंगची टोळी जेरबंद झाल्याने त्यांचे सर्वत्र अभिनंदन होत आहे.