वैद्यकीय महाविद्यालयासह नाशिकमधील अपूर्ण अवस्थेतील प्रकल्प लवकरात लवकर पूर्ण करावे- मंत्री छगन भुजबळ
वैद्यकीय महाविद्यालयासह नाशिकमधील अपूर्ण अवस्थेतील प्रकल्प लवकरात लवकर पूर्ण करावे- मंत्री छगन भुजबळ
नाशिक प्रतिनिधी
आरोग्य विद्यापीठातील वैद्यकीय महाविद्यालयासह गंगापूर येथे कन्व्हेशन सेंटर, साहसी क्रीडा संकुल व कलाग्राम सह नाशिक मधील अपूर्ण असलेले प्रकल्प लवकरात लवकर पूर्ण करण्यात यावेत अशी मागणी राज्याचे अन्न, नागरी पुरवठा व ग्राहक संरक्षण मंत्री छगन भुजबळ यांनी केली.
राज्याचे उपमुख्यमंत्री ना.देवेंद्र फडणवीस यांच्या प्रमुख उपस्थितीत नाशिक मेळा बसस्थानक लोकार्पण सोहळा पार पडला. त्यावेळी ते बोलत होते.
यावेळी पर्यटन मंत्री गिरीश महाजन, पालकमंत्री दादा भुसे, खासदार हेमंत गोडसे, आमदार प्रा.श्रीमती देवयानी फरांदे,आमदार सीमाताई हिरे,आ.ऍड. राहुल ढिकले,जिल्हाधिकारी जलज शर्मा,मनपा आयुक्त डॉ.अशोक करंजकर,पोलीस आयुक्त संदीप कर्णिक,विभाग नियंत्रक अरुण सिया,प्रशांत जाधव,बाळासाहेब सानप यांच्यासह पदाधिकारी व नागरिक मोठ्या संख्येने उपस्थित होते.
यावेळी मंत्री छगन भुजबळ म्हणाले की, नाशिकच्या बस स्थानकाचा विकास हा विमानतळाच्या धर्तीवर करण्यात आला आहे. ही वास्तू अतिशय सुंदर झाली असून नाशिकच्या या बस स्थानकाच्या धर्तीवर राज्यातील इतर बस स्थानकांचा विकास करण्याची आवश्यकता असल्याचे त्यांनी सांगितले.
ते म्हणाले की,नाशिकच्या विकासासाठी कृषी टर्मिनल मार्केट, किकवी पेयजल प्रकल्प,इगतपुरी हील स्टेशन,द्वारका ते नाशिकरोड चौपदरी उड्डाणपूल यासह अनेक महत्त्वाची कामे करण्यात यावी तसेच नाशिकच्या विकासासाठी भरघोस निधी उपलब्ध करून द्यावा अशी मागणी त्यांनी केली.
