एमडी ड्रग्जसह तिघांना अटक; आडगाव पोलिसांची धाडसी कारवाई;ग्रामीण भागातील तरुणांचा सहभाग चिंताजनक!
एमडी ड्रग्जसह तिघांना अटक; आडगाव पोलिसांची धाडसी कारवाई;ग्रामीण भागातील तरुणांचा सहभाग चिंताजनक!
नाशिक प्रतिनिधी : नाशिक शहरात अमली पदार्थांच्या वाढत्या अवैध व्यापाराविरोधात आडगाव पोलिसांनी मोठी कारवाई करत एमडी (मेफेड्रॉन) या प्रतिबंधित अमली पदार्थासह तिघा संशयितांना अटक केली आहे. या कारवाईत स्कॉर्पिओ-एन वाहन, महागडा मोबाईल आणि अमली पदार्थ असा एकूण २२ लाख ४० हजार रुपयांचा मुद्देमाल जप्त करण्यात आला आहे. पोलिसांनी केलेल्या या धाडसी कारवाईमुळे अमली पदार्थ तस्करांच्या हालचालींना मोठा आळा बसला आहे. नाशिक शहरात अमली पदार्थांची विक्री व सेवन रोखण्यासाठी पोलीस आयुक्त संदीप कर्णिक यांच्या आदेशानुसार विशेष मोहीम राबविण्यात येत आहे. त्याअंतर्गत पोलीस उपआयुक्त मोनिका राउत व सहायक पोलीस आयुक्त शेखर देशमुख यांच्या मार्गदर्शनाखाली आडगाव पोलीस ठाण्याचे वरिष्ठ पोलीस निरीक्षक उमेश पाटील यांनी गुन्हे शोध पथकाला विशेष सूचना दिल्या होत्या. दरम्यान, २८ मे रोजी गुन्हे शोध पथकातील पोलीस हवालदार दादासाहेब वाघ यांना गुप्त माहिती मिळाली की, काळ्या रंगाच्या स्कॉर्पिओ-एन वाहनातून काही इसम एमडी विक्रीसाठी शिवशक्ती पेट्रोल पंप, ओढा गाव परिसरात येणार आहेत. माहितीची खातरजमा केल्यानंतर पोलिसांनी तत्काळ सापळा रचला. पोलीस पथकाने परिसरात नजर ठेवली असता बातमीदाराने दिलेल्या वर्णनाप्रमाणे एमएच-१५-जेएस-४५९७ क्रमांकाची स्कॉर्पिओ-एन दिसून आली. पोलिसांना पाहताच वाहनातील संशयितांनी पळ काढण्याचा प्रयत्न केला. मात्र पोलिसांनी हार न मानता सरकारी व खासगी वाहनांच्या सहाय्याने संशयितांचा पाठलाग सुरू केला. तब्बल काही किलोमीटर पाठलाग केल्यानंतर पहाटे तीनच्या सुमारास छत्रपती संभाजीनगर महामार्गावरील माडसांगवी टोलनाक्याजवळ संशयितांना वाहनासह ताब्यात घेण्यात आले. ताब्यात घेतलेल्या संशयितांची नावे सुदाम मुरलीधर सोनवणे (वय २७, रा. भुसे, ता. निफाड), विशाल दत्तात्रय शिंदे (वय २९, रा. भेंडाळी, ता. निफाड) आणि विवेक नवनाथ खालकर (वय २४, रा. भेंडाळी, ता. निफाड) अशी आहेत. संशयितांची व वाहनाची झडती घेतली असता स्कॉर्पिओच्या डॅशबोर्डमध्ये लपवून ठेवलेले ६.५ ग्रॅम एमडी (मेफेड्रॉन) आढळून आले. त्यानंतर आडगाव पोलीस ठाण्यात एनडीपीएस कायद्याच्या कलम ८(क), २२(ब) व २९ अन्वये गुन्हा दाखल करण्यात आला. या कारवाईत ३५ हजार रुपये किंमतीचे एमडी, २१ लाख रुपये किंमतीची स्कॉर्पिओ-एन आणि १ लाख ५ हजार रुपये किंमतीचा सॅमसंग झेड फोल्ड मोबाईल असा एकूण २२ लाख ४० हजार रुपयांचा मुद्देमाल जप्त करण्यात आला आहे. अमली पदार्थांविरोधातील मोहिमेत आडगाव पोलिसांनी केलेली ही कारवाई महत्त्वाची मानली जात असून, नाशिक शहरात ड्रग्ज तस्करीविरोधात पोलीस अधिक आक्रमक भूमिका घेत असल्याचे या कारवाईतून स्पष्ट झाले आहे. पुढील तपास पोलीस उपनिरीक्षक विकास पंचमुख करीत आहेत.
ग्रामीण भागातही ड्रग्जचे लोण; निफाडच्या तरुणांचा सहभाग चिंताजनक
आडगाव पोलिसांनी एमडी (मेफेड्रॉन) या प्रतिबंधित अमली पदार्थासह तिघांना अटक करून २२ लाख ४० हजार रुपयांचा मुद्देमाल जप्त केल्याची कारवाई केवळ एक गुन्हेगारी घटना नसून ग्रामीण महाराष्ट्रासमोर उभ्या राहिलेल्या नव्या सामाजिक संकटाच्या धोक्याची घंटा आहे. या प्रकरणातील तिन्ही आरोपी निफाड तालुक्यातील ग्रामीण भागातील असल्याचे समोर आल्याने ड्रग्जचे जाळे आता शहरापुरते मर्यादित राहिले नसून ते थेट गावखेड्यांपर्यंत पोहोचल्याचे वास्तव अधोरेखित झाले आहे. एकेकाळी शेती, कष्ट आणि सामाजिक मूल्यांसाठी ओळखल्या जाणाऱ्या ग्रामीण भागात आता अमली पदार्थांचे सावट गडद होत चालल्याची भीती व्यक्त केली जात आहे. शहरांमध्ये ड्रग्जचा व्यापार सुरू असल्याच्या बातम्या अधूनमधून समोर येत असत; मात्र ग्रामीण भागातील तरुणच अशा गुन्ह्यांमध्ये आढळून येणे हे अधिक धक्कादायक आणि चिंताजनक आहे. मोबाईल, सोशल मीडिया, वाढती आर्थिक स्पर्धा, झटपट पैसा कमावण्याची मानसिकता आणि गुन्हेगारी टोळ्यांचे वाढते जाळे यामुळे ग्रामीण भागातील काही तरुण अमली पदार्थांच्या विळख्यात अडकत असल्याचे चित्र आहे. ड्रग्जचा वापर करणाऱ्यांपेक्षा त्याच्या विक्री आणि वाहतुकीच्या साखळीत सहभागी होणाऱ्यांची संख्या वाढत असल्यास त्याचे दूरगामी परिणाम संपूर्ण समाजाला भोगावे लागू शकतात. विशेष म्हणजे, या कारवाईत जप्त करण्यात आलेली महागडी स्कॉर्पिओ-एन आणि उच्च दर्जाचा मोबाईल हे अमली पदार्थांच्या अवैध व्यापारातून निर्माण होणाऱ्या आर्थिक साखळीचे संकेत मानले जात आहेत. कमी वेळात मोठा पैसा मिळविण्याच्या मोहापायी काही तरुण गुन्हेगारीकडे वळत असल्याचे वास्तव यामुळे पुन्हा एकदा अधोरेखित झाले आहे. ग्रामीण भागात ड्रग्जचे वाढते लोण हे केवळ कायदा व सुव्यवस्थेचे आव्हान नाही, तर सामाजिक, शैक्षणिक आणि कौटुंबिक व्यवस्थेसमोरील मोठे संकट आहे. आज एखादा तरुण वाहतुकीत किंवा विक्रीत सहभागी आढळतो; उद्या त्याच गावातील अनेक युवक व्यसनाधीनतेच्या गर्तेत जाण्याची भीती नाकारता येत नाही. त्यामुळे पोलिसांच्या कारवायांसोबतच ग्रामपंचायती, शाळा-महाविद्यालये, सामाजिक संस्था, पालक आणि स्थानिक नेतृत्व यांनीही जागरूकतेची मोहीम उभारणे गरजेचे आहे. अन्यथा शहरातून सुरू झालेले ड्रग्जचे हे विषारी जाळे ग्रामीण महाराष्ट्राच्या सामाजिक आरोग्यालाच पोखरण्याचा धोका निर्माण होऊ शकतो. आडगाव पोलिसांची कारवाई कौतुकास्पद असली तरी या घटनेने एक गंभीर प्रश्न समाजासमोर उभा केला आहे ड्रग्जच्या विळख्यातून आपल्या ग्रामीण भागाला वाचविण्यासाठी आपण किती सज्ज आहोत? यावर सखोल विचार व्हायला हवा.
