सत्याच्या शोधात “तेजस्वी’!

 सत्याच्या शोधात “तेजस्वी’

फलटणच्या डॉक्टर संपदा मुंडे यांच्या संशयास्पद मृत्यूने संपूर्ण राज्य हादरून गेलं आहे.

तरुण, सेवाभावी आणि तडफदार डॉक्टर  परंतु अचानक घडलेला मृत्यू…

आत्महत्या की हत्या?

हा प्रश्न आता प्रत्येक नागरिकाच्या मनात आहे. या गूढ मृत्यूचा तपास करण्यासाठी सरकारने नेमलेले विशेष तपास पथक (एसआयटी) या प्रकरणाच्या केंद्रस्थानी आले  आहे. आणि या एसआयटीचं नेतृत्व करणारं नाव आहे,आयपीएस तेजस्वी सातपुते.

 एक निर्भीड अधिकारी:-

तेजस्वी सातपुते,नाव घेताच आठवतो तो कर्तव्यनिष्ठेचा आणि धैर्याचा आदर्श.

सातारा जिल्ह्यात दीड वर्षे त्यांनी पोलिस अधीक्षक म्हणून  केले आणि कोरोनाकाळात केवळ पाच दिवसांत जंबो ऑक्सिजन कोविड सेंटर उभारून पोलिस आणि नागरिकांसाठी जीवन दिले . त्या काळात पोलिस दलाला त्यांनी दिलेली ऊर्जा, प्रशासनातील त्यांच्या समन्वयाची ताकद सर्वांनी अनुभवली.

ऑक्टोबर २०२० मध्ये त्या सोलापूर पोलीस अधीक्षक म्हणून रुजू झाल्या.

तेथे त्यांनी राबवलेले “ऑपरेशन परिवर्तन” हे उपक्रम प्रशासनातील संवेदनशीलतेचे उत्कृष्ट उदाहरण ठरले. सोलापूर जिल्ह्यात अनेक ठिकाणी हातभट्टीवर काम करणाऱ्या महिलांना त्यांनी दारूपासून दूर नेऊन त्यांना शिवणकाम, किराणा व्यवसाय यांसारख्या सन्मानजनक पर्यायांशी जोडले. ही  फक्त पोलिसी कारवाई नव्हती. हे सामाजिक पुनर्वसनाचं धाडस होतं.

 चांगल्या कामाचा मार्ग कधीच सोपा नसतो.

सोलापूर जिल्ह्यात त्यांनी वाळू माफियांविरुद्ध निर्णायक कारवाई केली. नदीपात्रातील धाडी, जेसीबी आणि डंपर जप्ती — या सगळ्यामुळे अनेकांच्या आर्थिक नाड्या थिजल्या. परिणामतः शक्तिशाली लोकांच्या डोळ्यात त्या खुपू लागल्या.

मार्च २०२२ मध्ये काही आमदारांनी विधानसभेतच सातपुते यांच्याविरोधात लक्षवेधी सूचना मांडल्या. “सोलापूर जिल्ह्यात अवैध धंदे, हफ्ते, धमक्या…” — असे आरोप झाले. पण या आरोपांना पुरावे नव्हते. सत्यापेक्षा  खोटारडे पणाचा आवाज मोठा होता. आणि अखेर सातपुते यांची बदली करण्यात आली.

बदली ही प्रशासकीय बाब असते, पण बदनामी करून बदली होणं हे अन्यायकारक असतं.

तेजस्वी सातपुते यांच्यासारख्या प्रामाणिक अधिकाऱ्यांच्या वाट्याला हा अन्याय वारंवार येतो. प्रणालीला ते झेपत नाहीत, योद्धा जेंव्हा शरण येत नाही तेंव्हा त्याला बदनाम केलं जातं.

 पुन्हा एकदा सत्याच्या रणांगणात:-

आज त्या पुन्हा एकदा एका अत्यंत संवेदनशील प्रकरणाच्या केंद्रस्थानी आहेत.

डॉ. संपदा मुंडे यांच्या मृत्यूच्या तपासासाठी नेमलेल्या एसआयटीच्या प्रमुखपदी तेजस्वी सातपुते यांची नियुक्ती हा  योगायोग नाही. प्रशासनाच्या अंतःकरणात अजूनही न्याय जिवंत असल्याची खूण आहे.

पण यातील विरोधाभासही लक्षवेधी आहे.

तेव्हाही राज्यात तेच सत्ताधारी होते, ज्यांच्या काळात सातपुते यांना बाजूला केले गेले.

आज त्याच सत्तेच्या अमलाखाली  तपासाच्या आघाडीवर रुजू  आहेत.म्हणूनच प्रश्न उभा राहतो, त्यांना खरोखरच स्वातंत्र्य मिळेल का?

तेजस्वी सातपुते केवळ अधिकारी नाहीत, त्या एक कवयित्रीही आहेत.

कोविड काळात त्यांनी आशा वर्कर्सवर लिहिलेली कविता — “आशा” — त्यांच्या मनातील भावविश्व उलगडते.

> “वर्ष सरले; पण तुझी वणवण कायम…

थर्मामीटर-ऑक्सिमीटर… दोनच शस्त्र लहान,

पण चिकाटीनं वाचवलेस तू अनेक प्राण.”

या ओळी सांगतात की सातपुते यांचं प्रशासन केवळ आकड्यांवर नाही, तर माणसांच्या माणुसकीच्या भावनांवर वर उभं आहे.

आज त्यांच्यासमोर पुन्हा एक मोठं सत्य उभं आहे —

एका तरुण डॉक्टरच्या मृत्यूचं, एका स्त्रीच्या न्यायाच्या लढ्याचं,आणि सत्तेच्या सावलीत लपलेल्या गूढ उत्तरांचं.

तेजस्वी सातपुते यांना जर खरं स्वातंत्र्य मिळालं,

जर त्यांच्यावर कोणतंही दडपण आलं नाही,

तर त्या नक्कीच सत्याला प्रकाशात आणतील.

पण जर पुन्हा त्याच सत्तेच्या खेळात त्यांना बळीचा बकरा बनवण्यात आलं,तर हा तपास फक्त एक “फाईल केस” म्हणून संपेल.

कारण… योद्धा कधीच  शरण येत नाही, पण व्यवस्था त्याला बदनाम करण्याचं शस्त्र चांगलं जाणून आहे .

आणि म्हणूनच, सत्याच्या या लढाईत तेजस्वी सातपुते यांना आपला नैतिक पाठिंबा देणं,ही फक्त पत्रकारितेची नव्हे, तर समाजाचीही जबाबदारी आहे.