ठाणेच्या टेंभी नाक्यावर बनावट जन्म व शाळा सोडल्याचा दाखला देणारे रॅकेट उद्ध्वस्त; सामाजिक कार्यकर्ते पत्रकार डॉ. बिनू वर्गीस यांच्या माहितीवरून कारवाई

ठाणेच्या टेंभी नाक्यावर बनावट जन्म व शाळा सोडल्याचा दाखला देणारे रॅकेट उद्ध्वस्त;

सामाजिक कार्यकर्ते पत्रकार डॉ. बिनू वर्गीस यांच्या माहितीवरून कारवाई

ठाणे |प्रतिनिधी

ठाण्यातील टेंभी नाका परिसरात बनावट जन्म प्रमाणपत्र आणि शाळा सोडल्याचा दाखला देणारे रॅकेट उद्ध्वस्त करण्यात आले आहे. ही कारवाई सामाजिक कार्यकर्ते आणि पत्रकार डॉ. बिनू वर्गीस यांच्या माहितीवरून करण्यात आली.

आनंद दिघे आश्रमाच्या मागे बनावट कागदपत्रांची देवाणघेवाण सुरू असल्याची माहिती डॉ. वर्गीस यांनी झोन १ चे डीसीपी सुबोध भुर्से यांना दिली. त्यानंतर ठाणे नगर पोलीस ठाण्याचे वरिष्ठ पोलीस निरीक्षक भरत चौधरी यांनी पोलीस उपनिरीक्षक दीपक खेडकर यांच्या नेतृत्वाखाली पथक पाठवले.

पथकाने पारस ग्राफिक्स, कम्प्युटर टायपिंग आणि झेरॉक्स सेंटर येथे छापा टाकून एका महिलेला बनावट जन्म प्रमाणपत्र देताना रंगेहाथ पकडले.

या रॅकेटचा खुलासा करण्यासाठी, डॉ. वर्गीस यांनी स्वतःचे नाव – बिनू एन. वर्गीस – बनावट प्रमाणपत्रासाठी दिले. केवळ ३० मिनिटांत त्यांना ₹१,००० च्या मोबदल्यात महाराष्ट्र शासन, आरोग्य विभाग, बृहन्मुंबई महानगरपालिका (BMC) च्या नावाने बनावट जन्म प्रमाणपत्र मिळाले, ही बाब अत्यंत धक्कादायक आहे.

—

बनावट दाखले फक्त ३० मिनिटांत तयार

बृहन्मुंबई महानगरपालिकेच्या नावाचा गैरवापर

स्थानिक झेरॉक्स व टायपिंग सेंटरमधून रॅकेट

 संपूर्ण रॅकेटचा छडा लावण्यासाठी तपास सुरू

पोलीसांनी गुन्हा नोंदवण्याची प्रक्रिया सुरू केली असून, या बनावट कागदपत्र रॅकेटमागे असलेल्या मोठ्या टोळीचा शोध घेण्यासाठी तपास सुरू आहे.

ही घटना दाखवते की किती सहजतेने आणि कमी वेळेत बनावट सरकारी दस्तऐवज मिळू शकतात – आणि हे समाजासाठी किती धोकादायक आहे.