इच्छा तिथे मार्ग :गंगामाता वाहन शोध संस्थेच्या सहकार्याने शहर वाहतूक युनिट ४ ने  लावला ३८ गाडयांच्या मुळ मालकांचा शोध

इच्छा तिथे मार्ग ही उक्ती पोलिसांच्या प्रामाणिक जबाबदारीला अधिकच अधोरेखित करते. इच्छा असेल तर अनेक क्लिष्ट गुन्ह्यांचा शोध पोलिस यंत्रणा लावू शकते, याची प्रचिती अनेक पोलिस अधिकारी कर्मचाऱ्यांनी दिली आहे. जिथे कुठलेच पुरावे, धागेदोरे मागे ठेवले जात नाहीत, त्या गुन्ह्यांचाही शोध लावणाऱ्या  पोलिस यंत्रणेला, विविध गुन्ह्यात जप्त झालेल्या, सापडलेल्या वाहनांच्या मूळ मालकाचा शोध घेणे कठीण नाही. अलीकडच्या तंत्र प्रगत जगात तर नाहीच नाही. हवी फक्त इच्छा. त्याच इच्छा शक्तीची प्रचिती अलीकडच्या शहर पोलिसांच्या कर्तबगारीतून येऊ लागली आहे. शहर वाहतूक शाखेने गेल्या महिन्या दोन महिन्याच्या कालावधीत दुसऱ्यांदा बेवारस वाहनांच्या मालकांचा शोध लावणे ह्याच इच्छाशक्तीचे द्योतक मानायला हवे.
बेवारस मालमत्तेतील एकुण ३८ वाहने,शहर वाहतुक शाखा युनिट ४ च्या आवारात बऱ्याच कालावधीपासुन जमा आहेत. त्यापैकी २१ दुचाकी व १७ अॅटो रिक्षा अशी एकुण ३८ वाहने बेवारस अवस्थेत अनेक वर्षापासुन धुळखात पडून असल्याने संपर्कात येणाऱ्या प्रत्येकाच्या  आरोग्याला  धोका निर्माण होण्याची शक्यता नाकारता येत नाही.

पोलीस ठाण्यात  शेकडो वाहने विविध गुन्हयात पोलीस जप्त करतात. मात्र न्यायालयीन प्रक्रीयेमुळे व बेवारस वाहनाचे मालक मिळुन येत नसल्याने ही वाहने पोलीस ठाण्याच्या आवारात अनेक वर्ष मालकाच्या प्रतीक्षेत धूळखात पडून आहेत. या पार्श्वभुमीवर नाशिक पोलीस आयुक्त संदिप कर्णीक  यांनी बेवारस वाहनांच्या मालकाचा शोध घेवुन ती वाहने त्यांच्या ताब्यात देण्याचे आदेश प्रभारी अधिकाऱ्यांना दिले. त्यानुसार  पोलीस उप आयुक्त, (मुख्यालय व वाहतुक) चंद्रकांन्त खांडवी, शहर वाहतुक शाखा विभागाचे सहा पोलीस आयुक्त  सुधाकर सुरडकर व शहर वाहतुक शाखा, युनिट ४ नाशिक शहर शाखेचे वरिष्ठ पोलीस निरीक्षक सुभाष पवार यांचे मार्गदर्शनानुसार पोलीसांनी बेवारस वाहनाच्या मालकाचा शोध घेण्यास सुरूवात केली. त्यासाठी पोलीसांनी पुरंदवाडी तळेगाव दाभाडे, ता मावळ, जि पुणे येथील महाराष्ट्रात अग्रेसर  असलेल्या गंगामाता वाहन शोध संस्थेची मदत घेतली. या संस्थेचे अध्यक्ष राम उदावंत यांनी नाशिकरोड पोलीस ठाण्यात येत बेवारस अवस्थेत असलेल्या वाहनांची पाहणी केली. उदावंत व पोलीसांनी बेवारस वाहनांचे चेसीस  व इंजिन क्रमाकांवरून दोनच दिवसात ३८ वाहनांच्या मुळ मालकाचा शोध लावला. त्यासाठी श्रेणी पोलीस उप निरीक्षक  अशोक तांबे, पोना  सुनिल पाचरणे (मुद्देमाल कारकुन), पोना  कैलास निबेंकर, मपोअं सुरेखा दळवी,यांच्यासह गंगामाता वाहन शोध संस्थेचे अध्यक्ष राम उदावंत, उपाध्यक्ष बाळासाहेब बागडे, भारत वाघ, यांनी परिश्रम घेतले. तसेच ज्या मालकांची वाहने असतील,त्यांनी पोलीस ठाण्यात  येवुन, आपले वाहन तपासुन घेवुन जावे. तसेच सदरचे वाहन घेवुन न गेल्यास कायदेशीर प्रक्रीया पुर्ण करून त्यांबा लिलाव केला जाईल व त्यातुन आलेली रक्कम सरकारी तिजोरीत भरण्यात येईल असे वरिष्ठ पोलीस निरीक्षक अशोक गिरी यांनी सांगीतले.

असा लावला जातो शोध:-

सुरुवातीला वाहनाचे चेसीस व इंजीन नंबर यांची यादी केली जाते. त्यानंतर वाहनांची विभागणी करून बेवारस, अपघात व गुन्हयातील वाहने अशी वर्गवारी करून मुळ मालकाच्या  घराचा पत्ता शोधला जातो. अनेकदा वाहन मालकाचा जुना पत्ता रजिस्टर नोंद असल्याने,मालक त्या मत्यावर मिळुन येत नाही. वाहनाची बारकाईने माहिती गोळा करून,मुळ मालकापर्यंत पोहचण्याचा प्रयत्न केला जातो. असे संस्थेचे अध्यक्ष राम उदावंत यांनी सांगितले.