“दोन लाखांत ‘वधू’चा सौदा… पोलिसांनी उधळला लग्नाच्या नावाखाली चालणारा काळाबाजार” सातपूर पोलिसांकडून  १९ वर्षीय तरुणीची सुटका; अंबड गुन्हे शाखेने दलाल केला जेरबंद 

नाशिक :प्रतिनिधी

 लग्नासारख्या पवित्र नात्यालाच काळा बाजाराचे रूप देणारा धक्कादायक प्रकार नाशिकमध्ये उघडकीस आला आहे. एका १९ वर्षीय तरुणीची दोन लाख रुपयांत विक्री करून तिचे जबरदस्तीने लग्न लावून दिल्याचा प्रकार समोर आला असून या प्रकरणात पोलिसांनी दोन टप्प्यांत धडक कारवाई केली आहे.

पहिल्या टप्प्यात सातपूर पोलिसांनी धाडस दाखवत तरुणीची सुखरूप सुटका केली, तर दुसऱ्या टप्प्यात अंबड गुन्हे शाखेने या रॅकेटमधील आरोपीला सापळा रचून अटक केली. या संपूर्ण घटनेने जिल्ह्यात खळबळ उडाली आहे.

 आईला आलेला धक्कादायक फोन

दि. २८ फेब्रुवारी २०२६ रोजी कार्बन नाका, सातपूर येथील सपना बुगप्पा कानकुर्ते यांनी सातपूर पोलीस ठाण्यात धाव घेतली. त्यांची कशिश राजू सोनवणे (वय १९) ही मुलगी २७ फेब्रुवारी रोजी घरातून बाहेर पडून परतली नव्हती.

दुसऱ्या दिवशी सकाळी कशिशने आईला फोन करून सांगितले की, राणी आणि भागी नावाच्या महिलांनी तिला दोन लाख रुपयांत विकले असून नांदगाव तालुक्यातील जातेगाव येथे एका मुलासोबत जबरदस्तीने लग्न लावून दिले आहे.

हा प्रकार ऐकताच कुटुंबासह पोलिसांनाही मोठा धक्का बसला.

घटनेचे गांभीर्य लक्षात घेऊन वरिष्ठ पोलिस अधिकाऱ्यांना तात्काळ माहिती देण्यात आली. त्यानंतर पोलीस आयुक्त संदीप कर्णिक, पोलीस उपायुक्त किशोर काळे आणि सहाय्यक पोलीस आयुक्त सचिन बारी यांच्या सूचनांनुसार वरिष्ठ पोलीस निरीक्षक प्रकाश अहिरे यांच्या मार्गदर्शनाखाली विशेष पथक तयार करण्यात आले.

पोलीस हवालदार दीपक खरपडे आणि महिला पोलीस अंमलदार वंदना पवार यांनी तातडीने नांदगावकडे धाव घेतली.

गावकऱ्यांचा घेराव… तरीही पोलिसांनी दाखवले धैर्य

नांदगाव पोलीसांच्या मदतीने शोध घेतला असता संबंधित तरुणी जातेगाव येथे नवनाथ खिडरहकर यांच्या घरी असल्याचे आढळले.

मात्र पोलिसांनी तिला ताब्यात घेण्याचा प्रयत्न करताच परिस्थिती तणावपूर्ण झाली. सुमारे २०० ते ३०० गावकऱ्यांनी पोलिसांना घेराव घालत “आम्ही दोन लाख रुपये देऊन लग्न केले आहे” असा दावा करत विरोध केला.

काहींनी पैसे परत देण्याची मागणी करत कायदा-सुव्यवस्था बिघडवण्याचाही प्रयत्न केला.

परिस्थिती हाताबाहेर जाण्याची शक्यता लक्षात घेऊन पोलिसांनी वरिष्ठांना कळवून अतिरिक्त कुमक मागवली. नांदगाव पोलीस स्टेशनचे प्रभारी निरीक्षक भदाणे यांच्या मदतीने अखेर तरुणीची सुखरूप सुटका करण्यात आली.

इव्हेंटच्या कामाचे आमिष… आणि थेट ‘लग्नाचा सौदा’

चौकशीदरम्यान तरुणीने दिलेली माहिती आणखी धक्कादायक होती.

राणी आणि भागी नावाच्या महिलांनी तिला “इव्हेंटमध्ये काम देतो” असे सांगून नाशिकहून प्रथम मालेगाव आणि नंतर एर्टिगा कारने जातेगाव येथे नेले. तेथे तिचे नाने नवनाथ सोपान खिडरहकर (वय ३७) यांच्याशी जबरदस्तीने लग्न लावण्यात आले.

या संपूर्ण व्यवहारासाठी दोन लाख रुपये घेतल्याचेही तपासात उघड झाले.

या प्रकरणी सातपूर पोलीस ठाण्यात गुन्हा रजिस्टर नंबर २८६/२०२६ अंतर्गत गुन्हा दाखल करण्यात आला.

गुन्हा दाखल होताच आरोपींनी मोबाईल फोन बंद करून पलायन केले होते. त्यामुळे त्यांचा शोध घेणे पोलिसांसाठी आव्हान बनले होते.

अंबड गुन्हे शाखेची सापळा कारवाई

दरम्यान अंबड गुन्हे शाखा युनिटला या प्रकरणातील आरोपीबाबत गुप्त माहिती मिळाली. त्यानुसार ७ मार्च रोजी अशोकनगर, सातपूर येथील मोहित अपार्टमेंट परिसरात सापळा रचण्यात आला.

या कारवाईत मयूर उत्तम शिरवाणी (वय ३०, व्यवसाय रिक्षा चालक) याला पोलिसांनी ताब्यात घेतले. चौकशीत त्याने गुन्ह्यातील सहभागाची कबुली दिली असून पुढील कारवाईसाठी त्याला सातपूर पोलीस ठाण्याच्या ताब्यात देण्यात आले आहे.ही कारवाई पोलीस आयुक्त संदीप कर्णिक, पोलीस उपआयुक्त किरणकुमार चव्हाण आणि सहाय्यक पोलीस आयुक्त संदीप मिटके यांच्या मार्गदर्शनाखाली करण्यात आली.

या पथकात वरिष्ठ पोलीस निरीक्षक जग्वेंद्रसिंग राजपूत, पोलीस उपनिरीक्षक मोतीलाल पाटील, सहायक पोलीस उपनिरीक्षक सुहास क्षिरसागर, पोलीस हवालदार प्रकाश बोडके, योगेश चव्हाण आणि पोलीस अंमलदार चारूदत्त निकम यांनी सहभाग घेतला.

या घटनेने एक गंभीर प्रश्न उभा केला आहे. ग्रामीण भागात विवाहासाठी मुलींची कमतरता, सामाजिक दबाव आणि दलालांचे जाळे याचा गैरफायदा घेत लग्नाच्या नावाखाली महिलांची विक्री करणारे रॅकेट कार्यरत असल्याची शक्यता व्यक्त होत आहे.

या प्रकरणात केवळ आर्थिक फसवणूक नाही, तर एका तरुणीच्या आयुष्याशी खेळ करण्यात आला आहे.

या संपूर्ण कारवाईत सातपूर पोलिसांनी दाखवलेले धैर्य आणि अंबड गुन्हे शाखेची तपासातील चपळाई पुन्हा एकदा अधोरेखित करते—

“कायद्याची कठोरता आणि हृदयाची कोमलता यांचा संगमच खऱ्या अर्थाने पोलिस सेवेचा चेहरा आहे.”